Ysige dae hier: Sterk wind jaag koue van Wes-Kaap tot in Noord-Kaap, Vrystaat

Die koue front wat vandag, Woensdag, die Suidwestelike Kaap getref het sal na verwagting Donderdag sy opwagting in die Noord-Kaapse en Vrystaatse binneland maak. Volgens voorspelling sal dié intense koue tot Sondag duur.

Swaar reën en sterk wind het reeds die kusgebied van die Suid- en Suidwestelike Kaap getref, en sneeu word oor die hoogliggende gebiede verwag.

Weens die sterk wind kan uiters hoë brandgevaartoestande oor die oostelike dele van die Noord-Kaap, die westelike dele van die Noordwes en Vrystaat voorkom, asook die gebied rondom Beaufort-Wes. Dié sterk wind kan ook ‘n gevaar inhou vir hoë voertuie. Langs die kusgebied word onstuimige seetoestande en swaar reën verwag.

Vir Woensdag word ‘n windspoed van 40 tot 50 km per uur oor die Noord-Kaap verwag: Vir Springbok, Upington en Kimberley 40 km per uur, Sutherland 45 km per uur, en De Aar 50 km per uur.

Die koue front sal na verwagting die Wes- en Noord-Kaap, asook die Vrystaat, van Donderdag tot Sondag beïnvloed. In die winterreënvalstreke sal behalwe die koue en winderige toestande, ook reën voorkom, aldus Vox Weather.

Temperature daal tot onder vriespunt

Die maksimum temperature vir ‘n groot deel van die binneland vir vandag is nog bo 20^oC – met 26^oC vir Upington, 24^oC vir Kimberley, 22^oC vir Welkom, 21^oC vir De Aar, en 20^oC vir Bloemfontein. Teen die westelike kusgebiede en aangrensende binneland is dit egter reeds heelwat kouer, met 10^oC by Springbok, 12^oC by Sutherland.

Wanneer die koue front egter die sentrale dele van die binneland tref, gaan temperature vir die volgende dae aansienlik verlaag.

Volgens The Weather Channel word die minimum en maksimum temperature in grade celsius (^oC )vir onderskeidelik Donderdag, Vrydag, Saterdag en Sondag soos volg voorspel:

Alexanderbaai: 7 en 15; 6 en 17; 6 en 17; en 9 en 2.

Bethlehem (Vrystaat): -1 en 14; -3 en 1; -1 en 14; en 0 en 17.

Bloemfontein (Vrystaat): -2 en 12; -5 en 11; -4 en 14 en -2 en 16.

Kakamas: 1 en 14; -2 en 13; -1 en 18; en 2 en 12.

Kimberley: -1 en 11; -4 en 11; -2 en 15 en -1 en 18.

Kuruman: -2 en 10; -3 en 12; -2 en 16; en 1 en 19.

Springbok: 1 en 8; 2 en 11; 3 en 15; en 6 en 18.

Sutherland: -1 en 4; -1 en 5; 0 en 10; en 2 en 14.

Upington: 0 en 13; -3 en 12; -2 en 17; en 3 en 20.

Welkom (Vrystaat): -2 en 15; -4 en 11; -3 en 14; en 0 en 17.