‘n Vrouedag-inisiatief wat ten doel het om vroue entrepreneurs uit die Namakwalandstreek te ondersteun en op te hef, is onlangs aangebied.
Die geleentheid het tien plaaslike ondernemings wat deur vroue bestuur word, ‘n geleentheid gegee om hul ondernemings aan ‘n paneel beoordelaars voor te lê.
Hierdeur het hulle vir finansiële ondersteuning en langtermyn-ontwikkelingsgeleenthede meegeding.
Die geleentheid in Springbok, The 9th Table, is deur die Kangnas-windkragaanleg befonds en het ten doel gehad om vroue letterlik en figuurlik plek aan die tafel te gee, hulle die ruimte te bied om hul entrepreneurskap-idees aan te bied, toegang tot hulpbronne en as veranderingsmakers in hul gemeenskappe erken te word.
“Hierdie inisiatief sluit aan by ons breër missie van volhoubare gemeenskapsontwikkeling. Dit fokus op die groei van besighede deur bate-gegronde ontwikkeling, die erkenning van potensiaal binne gemeenskappe en die hulp aan individue om hul toekoms te vorm,” sê Rouchet Daniels, ekonomiese ontwikkelingsbestuurder vir Kangnas-windkragaanleg.
Die drie top-aanbiedinge het R20 000, R10 000 en R5 000 onderskeidelik ontvang, sowel as mentorskap en sake-opleiding om mee te help dat deelnemers hul ondernemings buite die kompetisie versterk.
Een van die pryswenners is Shelly-Eunice Sauls, stigter van Enigma Services and Solutions, ‘n fotografie-onderneming in Nababeep. Die prysgeld by The 9th Table het aan haar die geleentheid gegee om nog professionele toerusting aan te skaf en dienste uit te brei.
“Hierdie ondersteuning is nie net befondsing nie; dit is ‘n belegging in my groei. Dit stel my in staat om werk van hoër gehalte te lewer, my dienste beter te bemark en ‘n volhoubare besigheid te bou,” sê sy.
You must be logged in to post a comment.