Die klassieke Waldorf-slaai is meer as 100 jaar gelede vir die eerste keer in New York, in die Waldorf Astoria-hotel bedien en dit bly ’n klassieke slaai. Die resep van Annelien Pienaar, uit haar boek Boerekos met ’n Twist, vervang die druiwekorrels met rosyne en sit karringmelk of jogurt by die mayonnaise. Dit is ’n vars somerslaai en die perfekte pasmaat vir ’n braai.
Jy benodig:
3 groot rooi appels met skil, in blokkies gesny
3 groot Granny Smith-appels met skil, in blokkies gesny
3 selderystingels, gekap
75 g rosyne
100 g pekanneute, gerooster en gekap
125 ml mayonnaise
125 ml karringmelk of gewone dubbelroomjogurt
15 ml suiker, heuning of versoeter
Só maak ’n mens:
1. Meng die mayonnaise, karringmelk of jogurt en suiker saam. Meng die res van die bestanddele en giet die sous oor.
2. Roer deur en plaas in die yskas vir ten minste ’n uur voordat jy dit wil voorsit.
– Karla Janse van Vuuren, Netwerk24
