Die begin van die jaar is die tyd wanneer die Suid-Afrikaanse roosdoyen Ludwig Taschner tuiniers aanmoedig om hul rose noukeurig te bekyk.
Anders as wintersnoei, waar al die roosbosse afgesny word, vereis somersnoei ’n beoordeling van elke individuele bos. Dit moet dan dienooreenkomstig gesnoei of versorg word.
Roosbome wat gereeld dooie koppe het, het min snoeiwerk nodig. Wanneer roosbome egter ’n digte bos geword het, word die binneste blare oorskadu.
Nooi die sonlig binne
As jy wil hê jou rose moet deur die winter blom, moet jy jou roosbos genoeg “oopmaak” sodat die sonlig op al die blare kan val, sê Taschner.
Verwyder alle roosvruggies – sodra hulle vorm, hou die roos op met blom. Dun jou roosbos van die middel uit. Los sowat vier of vyf sterk groeiende stingels agter, maar sny hulle met ’n derde tot 50% terug. Dié soort somersnoei is veral voordelig vir baster-teerose omdat dit die bosse aanmoedig om van laer af te spruit. Behou ’n goeie balans van blare op die bos om die sap tussen die wortels en blare te laat vloei.
Snoei geleidelik terug
Rose wat te hoog gegroei het, kan ook teruggesnoei word. Die veiligste manier om dit in die warm weer te doen, is geleidelik. Doen dit oor ’n tydperk van twee tot drie weke. Deur dit bietjies-bietjies te doen, word die blaarbedekking nie drasties verminder nie en word die sapvloei van die plant nie ontwrig nie.
Stut en bind klimmers op
Indien klimrose handuit geruk het, is dit die beste om die lang nuwe lote so horisontaal moontlik op hul traliewerk of stutraam vas te bind. Dit moedig blom in die lengte van die stam aan. Van die ouer stamme kan uitgesny word om vir nuwe groei ruimte te bied.
Hou voete droog
Met goeie reën is veral nat voete ’n kopsorg vir rooskwekers. Weens swak dreinering word daar met versuiping op wortelvlak gesukkel.
Versuipte rose groei nie goed nie. Die blare kan geelgroen word of selfs verlep. As die rose uitgegrawe word, is die wortels vlak en groei dit plat terwyl hulle suurstof soek. Herplant die rose in ’n verhoogde bedding, minstens 30 cm hoog. Werk organiese stowwe soos grondboondoppe in om die dreineringsprobleme op te los. In baie nat gebiede moet die beddings opgelig of dreineringslote gegrawe word.
Behandel swartvlek
Die swamsiekte swartvlek is nog ’n ergerlikheid wat roosliefhebbers teister, veral met voortdurende reën.
Wanneer roosblare ses uur of langer nat is, word die swartvlekspore aktief en dring dit die roosblaar binne.
As dit nie behandel word nie, versprei swartvlek na al die blare, wat dan doodgaan en afval. Dit stel die stingels bloot aan sonbrand en uiteindelik stamkanker, wat die roos doodmaak.
Die doeltreffendste swamdoder is Chronos omdat dit binne minute geabsorbeer word en die blare van binne verseël sodat die spore nie binnegedring kan word nie. Al het die roos swartvlek, sal dit verhinder dat die swam verder versprei.
