Hy is in 1970 skool toe.
Kort daarvoor is die metrieke stelsel in gebruik geneem.
Daar is nie meer in duime en voete gemeet nie, maar in millimeters en meters. Myle is met kilometers vervang.
Die onderwyseres het hulle heeltyd daaraan herinner dat hulle van hierdie groot verandering moes onthou. Sy het klem daarop gelê dat hulle nou in ander mates moes meet.
Hulle het senuweeagtig geraak.
Die gesukkel was dat hulle, as sesjariges, glad nie geweet het wat ’n duim en ’n myl se afmetings was nie. Daarom het dit hulle nie gepla dat dit verander het nie. Hulle moes net die regte afmetings geleer word.
Soms gebeur dieselfde wanneer iemand enigiets iets nuuts geleer word.
Gestel ’n kollega sluit hom of haar by ’n onderneming aan. Vir daardie persoon bestaan daar nie noodwendig ’n verwysing van hoe dinge voorheen gedoen is nie. Hy of sy wil net graag die huidige manier waarop dinge gedoen moet word, aanleer.
Ongelukkig kan dit dan gebeur dat die een wat die kennis moet oordra, vashaak by die manier waarop dit voorheen gedoen is. Die verskille. Die redes waarom dit verander het. Hoeveel makliker of moeiliker die vorige manier was.
Uiteindelik is die nuwe kollega verward. Wat was nou weer die ou manier en hoe moet die nuwe manier benader word?
Wees bewus van iemand vir wie jy iets moet leer se kennis, verwysingsraamwerk en agtergrond. Dalk gaan dit minder verwarring veroorsaak.
