Pak tuinmaakprojek aan om voedsame kos in Loeriesfontein te kweek

Om voedselonsekerheid teen te werk en selfonderhouding te bevorder, het die gemeenskap van Loeriesfontein ‘n voedseltuin-projek begin.

Die projek, gefinansier deur die Loeriesfontein- en Khobab-windkragaanleg, rus 27 inwoners toe met die vaardighede en hulpbronne om voedsame kos te kweek terwyl hulle landbou-entrepreneurskapsopleiding ontvang.

Die program het ten doel om die uitdaging van beperkte voedseltoegang in Loeriesfontein aan te spreek, waar vars produkte duur is en afhanklikheid van eksterne bronne groot. Deur inwoners aan te moedig om agterplaastuine te maak, help die projek om langtermyn voedselsekerheid binne die gemeenskap te bou.

“Ons het die behoefte erken om verder as tradisionele voedselbystand te gaan en ‘n langdurige oplossing te bied wat onafhanklikheid, vaardigheidsontwikkeling en verbeterde toegang tot voedsel bevorder. Deur die ontwikkeling van praktiese, oordraagbare vaardighede hoop die projek om ‘n sterker en meer selfstandige gemeenskap te bevorder,” sê Vanessa Fredericks, ekonomiese ontwikkelingsbestuurder vir die windkragaanlegte.

‘n Opleidingsprogram van twee weke is begin waarin deelnemers teoretiese en praktiese opleiding in landbou-entrepreneurskap ontvang,. Die program het ook klem gelê op mentorskap en gemeenskapsgedrewe produksie om te verseker dat deelnemers dit wat hulle geleer het in werklike omgewings kan toepas.

Die 27 deelnemers gekies volgens wie eerste opgedaag het, ná oorweldigende reaksie. Begunstigdes is boonop met tuinmaakgereedskap, materiale en voorraad toegerus om hulle te help om hul tuine suksesvol te begin en in stand te hou.