Die voorraad van byna alle soorte eetbare olie, soos soja- en sonneblomolie, is wêreldwyd drasties laag.
Volgens die oliekenner Thomas Mielke, hoof van Oil World met sy hoofkantoor in Duitsland, raak Rusland se inval in Oekraïne veral die beskikbaarheid van sonneblomolie wat van die Swartsee-omgewing ingevoer word.
Mielke het vandeesweek op ’n seminaar van die Suid-Afrikaanse Willowton-groep gepraat. Dié groep lewer produkte soos Sunfoil- en Crown-kookolie en Sunshine-margarien.
Oekraïne is die wêreld se grootste uitvoerder van sonneblomolie, en is verantwoordelik vir 46% van dié olie se vervaardiging. Die naasgrootste vervaardiger is Rusland, wat in 23% van die wêreld se vraag voorsien.
Mielke sê vooruitskattings wys boonop dat die wêreld sowat 5 miljoen ton minder oliesade in die 2021-’22-siklus as voorheen gaan produseer. Dit sluit tien soorte olieproduserende plante soos sonneblom in.
