’n Aantal Noord-Kapenaars was onlangs deel van die Suid-Afrikaanse Gazelle-span wat aan die tiende Afrika-toutrekkampioenskappe in Zimbabwe deelgeneem het.
Altesaam 29 klubs en 412 atlete van verskeie Afrika-lande het aan dié byeenkoms aan die einde van Junie by die Victoria-valle deelgeneem. Mans én vroue van die Noord-Kaap was in die span ingesluit, asook twee afrigters van Noord-Kaap Toutrek, Werner Kleynhans en Kobus Louw. Die Suid-Afrikaners het verskeie medaljes ingepalm in die vyf afdelings waarin deelgeneem is.
In die 640 kg- en 720 kg-klubafdeling, oop en geslote, het Suid-Afrika goud verwerf.
In die 600 kg-gemengde afdeling, oop en geslote, is ook goud verwerf.
So is goud ook verwerf in die vroue 560 kg geslote afdeling.
Die vroue-afdeling 520 kg, oop en geslote, het silwer ontvang.
Drie Noord-Kapenaars is in die Springbokspan ingesluit wat in September aan die Wêreldkampioenskap in Duitsland gaan deelneem. Hulle is Johan Nel van die Postmasburg-toutrekklub, asook Blanche Swanepoel en Dané Jooste, albei van die Flamingo-toutrekklub in Kimberley.
Toutrek word beskou as een van die sportsoorte wat die meeste krag oor ’n kort tydperk vereis, met tegniek en sinchronisering as ’n span van uiterste belang.
