Vanjaar vier Loslitdag 30 jaar waartydens dit ’n wesenlike verskil in die lewe van persone met gestremdhede in Suid-Afrika maak.
Wat as ’n eenvoudige geldinsamelingsprojek begin het, het tot ’n nasionale dag van bewusmaking, voorspraak en viering gegroei.
Loslitdag vind vanjaar op Vrydag 6 September plaas, met die tema: “Ek sien jou”.
Dié tema beklemtoon die belangrikheid om die waarde en waardigheid van elke individu te erken, om uitdagings en potensiaal raak te sien, en mense te erken vir wie hulle is.
Dit moedig ander aan om die unieke bydraes van persone met beperkinge te erken en te waardeer. Deur die jare het dit suksesverhale van veerkragtigheid en triomf vertel, en die vermoë van persone met beperkinge ten toon gestel, stereotipes uitgedaag en hindernisse afgebreek.
Die geld wat ingesamel word, dra tot bemagtiging en insluiting by en ondersteun programme en organisasies wat daarop gemik is om die lewe van persone met beperkinge te verbeter, soos die bepleiting van beleidsveranderinge wat toeganklikheid en gelykheid bevorder.
Bel Dorothy-Anne Howitson, sekretaresse van die Vereniging vir en van Persone met Gestremdhede (APD), Frances Baard-distrik, by 082-926-5754 om Loslitplakkers, hoede of T-hemde te bestel, of om uit te vind hoe jou skool, kerk, organisasie of besigheid hierby betrokke kan raak.
