Om elke skooldag ’n kosblik te pak, kan ’n uitdagende aktiwiteit raak.
Tog kan ’n paar wenke gevolg word om te verseker dat ’n kind se kosblik interessant bly.
- Maak seker die kosblik is gebalanseerd en bevat al die basiese voedselgroepe: koolhidrate, proteïene, suiwel, vet, vrugte en groente.
- Gee water saam om jou kind se konsentrasievermoë helder te hou.
- Pak die kosblik die vorige aand. Só vermy jy die geskarrel vroegoggend en kan jy meer tyd aan die beplanning en bereiding van die kos bestee.
- Probeer om verfynde koolhidrate en suikers te vermy.
- Kies kossoorte wat teen pouse nog lekker gaan lyk en nie te skerp sal ruik nie (waak teen tuna en eier).
- Skil jou kind se vrugte af. Baie kinders hou nie van vuil of taai hande nie en word daardeur afgeskrik.
- Kinders is gewoonlik baie gretig om te speel en wil so gou moontlik eet. Gee hulle dus klein, hanteerbare porsies soos vingerbroodjies en stukke vrugte.
- Pak ’n naskoolpakkie in as jou kind aan buitemuurse bedrywighede deelneem.Droëvrugte, neute, sade en biltong is geskik vir aktiewe kinders met hoë energiebehoeftes.
- Laat jou kind sy of haar kosblik kies.
- Sny die kos in interessante vorms.
Pak dít in
Sekere kossoorte behoort elke dag in jou kind se kosblik te wees.
- Koolhidrate en stysel is ’n bron van energie. Dit moet kos met ’n lae-GI wees, soos twee snye volkoringbrood. Gebakte soetpatat-skyfies is ’n goeie alternatief.
- Proteïene verseker volgehoue konsentrasie – eier, biltong, hoendervlerkies of ’n stukkie vleis is ideaal.
- Vet bly ’n belangrike bron van energie. Gebruik botter of mayonnaise op ’n toebroodjie, of sit neute in die kosblik.
- Vrugte of (onversoete) vrugtesap (200 ml) is vol vitamiene, minerale en vesel. Pak aarbeie, appels of druiwe in.
- Groente is lekker peuselhappies. Pak stukkies wortels en suikerertjies in.
- Suiwel is ’n belangrike bron van kalsium. Pak klein blokkies kaas in. Jy kan ’n tandestokkie gebruik en tamaties, kaas en vleis daarop inryg.
