Minette Kruger, ’n gr. 10-leerling aan die Hoërskool Diamantveld in Kimberley, het op ’n onlangse wêreldkampioenskapsbyeenkoms ’n silwermedalje in gemengde gevegskuns verower.
Sy het op 20 Augustus aan die International Mixed Martial Arts Federation (IMMAF) se byeenkoms in Aboe Dhabi deelgeneem, waar sy haar land as Suid-Afrika se o.18-vrouekampioen verteenwoordig het.
Die Suid-Afrikaanse span het uit vier meisies en 16 seuns bestaan, en die meisies het altesaam een goue, een silwer- en twee bronsmedaljes gewen.
Die span het die negende plek behaal, uit 41 lande wat meegeding het.
Die 16-jarige Minette is, sover bekend, die eerste vrou tot nog toe in Suid-Afrika om vir deelname aan ’n wêreldkampioenskap in stoei, asook dié van gemengde gevegskuns, te kwalifiseer.
Die byeenkoms in stoei het van 17 Julie tot 3 Augustus in Rome, Italië, plaasgevind. Hier was Minette 17de in die o.17-afdeling. Deelnemers aan dié toernooi was van 51 lande afkomstig.
