Met die ANC wat 33 van die 65 setels in die Sol Plaatje-munisipaliteit in Kimberley hou, word die komende tussenverkiesing op 22 Februarie in wyk 1 as ’n “hoë risiko verkiesing” deur ingeligtes bestempel.
Die ANC, DA en Patriotic Alliance (PA) voer sterk veldtogte in dié wyk wat uit gedeeltes van Roodepan en Platfontein bestaan. Die tussenverkiesing is ná die dood van Annie Gallant, ANC-raadslid, genoodsaak.
Opposisiepartye meen die beurtkragkrisis en gevolge daarvan dra tot die ANC se probleme by.
Die DA slyp hul tande om die ANC se greep te verswak en in koalisieregering saam te werk. Harold McGluwa, DA-leier, sê die ANC is met rede bekommerd.
“Hulle weet hoe gefrustreerd mense met diensprobleme is. Inwoners is desperaat en moeg vir leë beloftes terwyl armoede, lewenskoste en werkloosheid toeneem. Kimberley se paaie is vol slaggate, daar is rioolprobleme in Roodepan en swak watertoevoer in Platfontein. Vinnige maar swak herstelwerk los nie probleme op nie.
“Die tussenverkiesing is ’n goue geleentheid om van die ANC ontslae te raak en verandering te bring. Die vuil en verwaarloosde stad kan omgekeer word. Ander tussenverkiesings soos in Kareeberg bewys DA-steun neem toe. Mense moenie vir kleiner partye stem en die stemme verdeel nie.”
Die ANC plaas byna daagliks video’s en foto’s op sosiale media van sy weke lange, intense veldtog waarin partylede, uitvoerende komiteelede en die voorsitter kiesers wil oortuig.
Verlede Sondag het dr. Zamani Saul, Noord-Kaapse ANC-voorsitter en Noord-Kaapse premier, vir Ferguson Moses as wykskandidaat en Alene Bosman as hul nuwe proporsionele kandidaat aan die Gereformeerde Griekwa-kerk in Roodepan voorgestel.
In sy Afrikaanse toespraak het Saul gesê sewe ANC-partyleiers was ook kerklikes en dat die party in ’n kerk gestig is. Op sy beurt het Moses die “premier bedank vir die skenking wat hy aan die kerk” gedoen het. Hy het gesê die ANC is lief vir die kerk en die lede versoek om vir die ANC te stem. Die gemeente het daarna vir die ANC-afvaardiging gebid.
McKenzie neem die ANC kwalik omdat hulle Marlon Daniels, PA nasionale voorsitter, ondanks ’n ooreenkoms nie ’n posisie op die Sol Plaatje-burgemeesterskomitee gegee het nie. Daniels is afgevaardig om te verseker “dat mense werksgeleenthede kry. Ons het so ’n goeie koalisie in die Noord-Kaap met die ANC gehad, maar dit is verby.”
In die Karoo Hoogland-munisipaliteit het die DA vroeër ’n mosie van wantroue teen die PA-burgemeester en die PA-speaker ingestel.
“Deur buite stemming te bly, het die ANC eintlik die DA en VF Plus teen ons ondersteun,” sê McKenzie. “Dit terwyl ons ter wille van die ANC in die Hantam- en Kgatelopele-munisipaliteit gestem het. Die ANC het intussen weer ’n mosie van wantroue in die DA-burgemeester en VF Plus-speaker ingestel. Enige PA-raadslid wat die ANC hierin ondersteun sal as partylid verwyder word.”
Die ANC het die mosie wat op 23 Januarie sou plaasvind, laat vaar.
Prof. André Duvenhage, politieke ontleder van die Noordwes-universiteit, sê die situasie weerspieël ook in ander munisipaliteite in die land.
