Ná meer as 130 jaar gedy Georgestraat in Kimberley steeds as ’n nywerheidsgebied, met ’n verskeidenheid ondernemings wat onverpoos hier besigheid doen.
Talle gevestigde ondernemings word al jare lank in dié straat gehuisves, en nuwe ondernemings maak ook gereeld hier hul verskyning.
Die hedendaagse Georgestraat, wat met Longstraat parallel loop, begin teen Waterloostraat en eindig teen Phakamile Mabijaweg, vanwaar die naam na Yorkstraat verander.
Georgestraat, soos besoekers dit vandag beleef, is drasties anders as die grondstraat van meer as 100 jaar gelede waar die skote geklap en die poppe behoorlik gedans het – veral in die bordele wat in Kimberley se “wilde dae” hier teenwoordig was.
Die straat is teen die Groot Gat-gebied geleë en was tydens die diamantstormloop die belangrikste straat vir handeldryf.
Min van Georgestraat se historiese geboue, wat aan Kimberley se delwersverlede herinner, het egter behoue gebly.
Vandag huisves Georgestraat ’n verskeidenheid gevestigde sakeondernemings en ligte nywerhede.
Dié straat is al as “die hoofaar van Kimberley se sakebedrywighede” beskryf.
Dit is ook algemeen bekend dat indien ’n mens wonder waar om ’n spesialisproduk in die hoofstad van die Noord-Kaap in die hande te kry, die kans goed is dat ’n onderneming of twee in Georgestraat dit in voorraad sal hê.
