Die provinsiale regering word versoek om die leemte te vul wat deur die beplande sluiting van die Organisasie vir Alkoholverwante Navorsing (Farr) in die Noord-Kaap gelaat sal word.
Weens ‘n gebrek aan ondersteuning en befondsing het Farr se gemeenskapsentrums en projekte in Hanover en Renosterberg op 31 Maart vanjaar gesluit. Luidens ‘n verklaring van Karen Jooste, DA-LPW en die Noord-Kaap woordvoerder oor maatskaplike ontwikkeling, sal Farr sy deure in 2026 heeltemal sluit.
Uitsonderlike navorsing wat deur die fasiliteit gedoen is, het die kollig laat skyn op die verwoestende impak van fetale alkoholnoodsindroom (FASD) in die provinsie.
In 2001 het Farr onthul dat die 11,9% FASD-voorkoms in De Aar die hoogste gedokumenteerde voorkomssyfer ter wêreld was. Sedertdien het Farr studies in Emthanjeni en Renosterberg gedoen, wat selfs hoër koerse van FASD getoon het, naamlik 28,2% in Renosterberg, 20,8% in Hanover en 21,4% in Britstown.
Farr se sluiting hou ernstige gevolge vir Noord-Kaapse gemeenskappe in, sê Jooste.
Farr het ‘n deurslaggewende rol gespeel om te demonstreer hoe bewysgebaseerde ingrypings bewustheid, voorkoming en herstel kan ondersteun. Hul ervaring en data oor die afgelope twee dekades is van enorme waarde. Farr se gemeenskapsentrums het kritieke ondersteuning deur middel van bewustheid-, voorkoming-, opleiding- en ondersteuningsprojekte vir die hele samelewing gebied.
Die party het vrae vir skriftelike antwoord aan die departement voorgelê om vas te stel hoe hulle die sluiting van die navorsingsfasiliteit sal versag, watter ingrypings hulle sal instel om bewustheid te verhoog en ondersteuning aan gemeenskappe te bied, en hoe hulle alkoholverwante skade in die provinsie sal bestuur.
