‘n Toenemende aantal families in die Emthanjeni-munisipaliteit, wat dorpe soos De Aar, Hanover en Britstown insluit, soek desperaat hulp vir hul dwelmverslaafde kinders en kleinkinders.
Sulke dienste is nie geredelik in die gebied beskikbaar nie, en diegene wat dwelmrehabilitasiedienste nodig het, moet ver afstande aflê, terwyl hul name op lang waglyste geplaas word, met van die dienste onbekostigbaar.
Só sê Roweda Adams-Beukes, DA-raadslid. Die party het ‘n petisie aan die LUR van maatskaplike ontwikkeling, Nontobeko Vilakazi, oorhandig waarin uitgebreide toegang tot dwelmrehabilitasiedienste in Emthanjeni se dwelmgeteisterde dorpe dringend geëis word.
LEES OOK: Violence, pregnant teenagers and booze at De Aar’s end of the world
Dié oorhandiging deur Fawzia Rhoda, kiesafdelingshoof van Bo-Karoo, volg ná Vrydag 7 November se optog deur De Aar. Griewe rakende probleme om hulp vir verslaafdes te kry is aan die distriksbestuurder, Henry Biko, voorgelê.
De Aar, Hanover en Britstown word toenemend deur dwelms geteister. Gemeenskappe is in ‘n krisis, aangesien ‘n toenemende aantal jongmense aan dwelms verslaaf raak. Navorsingsartikels dui aan dat Noord-Kaapse inwoners aan hoë dwelmmisbruik blootgestel is, met talle leerders wat dit vanaf ‘n baie jong ouderdom gebruik.
Alkoholmisbruik is ook in dié streek buite beheer. Dié streek is bekend vir ‘n buitengewoon hoë koers van fetale alkoholsindroom.
LEES OOK: No ‘safe time’ to consume alcohol during pregnancy
Dit word vererger deur die besluit van die Foundation for Alcohol Related Research (FARR) om sy deure in die Noord-Kaap te sluit. Dié organisasie het ‘n waardevolle rol gespeel, met datagedrewe ingrypings en gemeenskapsentrums wat voorkoming en herstel ondersteun het.
Die party doen ‘n dringende beroep op die departement van maatskaplike ontwikkeling om leiding te neem deur die beskikbaarheid van dwelmrehabilitasiedienste binne die Emthanjeni-gebied uit te brei.
‘n Beter toekoms vir die jeug hang af van hul toegang tot dienste wat sal help om hul verwoestende afhanklikheid van dwelms en alkohol te oorkom, sê Adams-Beukes.
LEES OOK: Farr-sluiting: Ernstige gevolge vir bewustheid van fetale alkoholsindroom
