Met vanjaar se rugbyseisoen wat binnekort afskop, het die Kakamas-rugbyklub weer sy jaarlikse Kalahari-sewestoernooi – vir die vierde jaar – aangebied.
Die eerste wedstryde is Vrydagaand (22/02) gespeel. Saterdagoggend (23/02) is die spelers deur egte Kakamas-hitte begroet waarin die rugby- en netbalspelers om die Kalahari- sewestitel meegeding het.
Die netbal-afdeling is deur Upington Dorp gewen – vir die tweede jaar agtereenvolgens.
Divisie 2 van die toernooi se sewesrugby is deur die Defence Force Collegians se tweede span gewen.
Rugbyspanne van so ver soos Kaapstad, Robertson en Windhoek het aan Divisie 1 deelgeneem en het die spanne van die Noord-Kaap laat les opsê.
Noordelikes van Avonwood in die Kaap het in die eindstryd teen Robertson uitgedraf en met ’n eindtelling van 26 – 12 koning gekraai.
